OBRADOIRO DE REGUEIFAS (18-10-2024)

- O venres 18 de outubro, no primeiro Obradoiro de Regueifas, o alumnado de 2º da ESO compartiu con Pinto d'Herbón bos momentos de coplas cantadas.

 

- O 4 de novembro tivo lugar a segunda sesión do Obradoiro de Regueifas. Pinto d'Herbón louvou a capacidade do noso alumnado para rimar coplas e cantalas. Un aplauso a tanta creatividade!

   

 

 

  

Obradoiro de regueifas con Pinto de Herbón

Hoxe fixemos un obradoiro de Regueifa!

A Regueifa era un pan de voda ou unha serie de versos en forma de desafío que alí se cantaban...ou ambas cousas a un tempo.

Este obradoiro de regueifas, que está a percorrer os centros de ensino secundario da provincia tráenos este saber popular, que ten moito de improvisación e de enxeño.

Todo isto que nos parece que é moderno coma o rap, o hip - hop, as pelexas de galos... xa vén de vello! E é noso e tamén doutras latitudes: de bertsolaris en Euskadi, desafíos en Portugal, glosas nas illas Baleares ou curranda en Cataluña.

O mestre de cerimonia foi o gran regueifeiro Pinto de Herbón que nos ensinou a técnica para compoñer unha regueifa, a improvisar e a perder a vergoña. 

 Porque os de Sanxenxo cando nos poñemos.....tamén sabemos REGUEIFAR

 

I Certame de Regueifas

O pasado xoves 11 de  Abril tivo lugar no Auditorio Emilia Pardo Bazán o I Certame de Regueifas Concello de Sanxenxo, organizado polo IES Sanxenxo en colaboración cos Equipos de Dinamización Lingüística do IES Vilalonga e  Colexio Plurilingüe Abrente.

 
Cento oitenta alumnos e alumnas de 1º e 2º de ESO dos 3 centros de ensino de secundaria do municipio  déronse cita para apoiar aos compañeiros que os representaban e que subiron ao escenario para amosar todo o aprendido nas dúas sesións formativas previas desenvolvidas polos regueifeiros Lupe Gómez e Josinho de Tareixa.

 
O obxectivo cando ideamos este certame era  que os xóvenes empregasen a lingua propia de xeito natural e a vinculasen a actividades lúdicas mellorando a súa expresión oral.
Tamén queriamos achegarlle a regueifa, unha tradición de carácter popular moi estendida no seu día e que hoxe diferentes persoas e asociacións traballan pola súa recuperación.

 
Non podemos máis que agradecer tanto aos responsables dos centros, ao concello de Sanxenxo, á Secretaría Xeral de Política Lingüística  e á ANPA do IES Sanxenxo a axuda e colaboración para levar a bo termo esta actividade.
E por suposto, felicitar ao alumnado que amosou respecto polos compañeiros, enxeño, ganas de divertirse e de aprender e que mostrou con orgullo as súas habilidades improvisatorias e deu ánimos a todos nunha festa para a cultura e para a  lingua galega.



Moitos medios fixéronse eco da noticia e foi moita a repercusión. Aquí deixamos algunhas ligazóns:

https://www.farodevigo.es/portada-pontevedra/2019/04/12/regueifas-promover-o-galego-oral/2086618.html

https://pontevedraviva.com/xeral/53849/batalla-regueifas-sanxenxo/?lang=es

https://www.elcorreogallego.es/tendencias/ecg/primeiro-certame-regueifas-sanxenxo/idEdicion-2019-04-12/idNoticia-1176644/

https://porgaliciabaixo.com/web/es/1o-certamen-de-regueifas-del-ayuntamiento-de-sanxenxo/

https://www.farodevigo.es/portada-pontevedra/2019/04/09/obradoiros-e-certame-regueifas-pazo/2084654.html

Obradoiro de regueifas

Antigamente a regueifa era un pan ou unha rosca que se regalaba nas vodas entre os convidados e que repartía aquel máis enxeñoso na arte da improvisación.

Co obxectivo que os xóvenes empreguen a lingua propia de xeito natural e a vinculen a actividades lúdicas mellorando a súa expresión oral estanse a desenvolver nos diferentes institutos de secundaria do concello un obradoiro de regueifas onde a axilidade mental, o ritmo e o enxeño son elementos primordiais para a composición destas coplas. Unha tradición presente en moitos lugares do mundo e que vinculan ao ser humano coas súas raíces e coa palabra, elemento indispensable para crear historias.

Lupe Gómez e Josinho de Tareixa son os encargados de guiar ao alumnado nesta arte da improvisación

Dúas sesións servirán para preparar a alumnos e alumnas de 2º de ESO para o certame intercentros que terá lugar o 11 de abril no Auditorio Emilia Pardo Bazán e que conta coa colaboración da Secretaría Xeral de Política Lingüística.

Regueifeiras

     O martes 30 fomos á cidade de Compostela, a facer unha actividade cun grupo de alumnas e alumnos de 4º da ESO, no Museo do Pobo Galego.

     Unha actividade que, definitivamente, nos gustou moito!

     Fixemos un obradoiro de Regueifa!

     A Regueifa pode ser un pan, ou unha serie de versos en forma de desafío dialectal.  Aínda que non nos importaría aprender a facer pan, non foi o caso.

     Nesta ocasión, ensináronnos a facer os versos dunha regueifa, a improvisar, e todo cun verniz de xénero xa que, tal e como nos contaron as regueifeiras, ás mulleres, non se lles permitía cantar en público antes.  E non porque houbera unha prohibición explícita, senón porque aquelas que o facían, quedaban expostas publicamente, coma mulleres de mala reputación.  O que xa era dabondo para non facelo.

     O caso é que hoxe en día xa hai regueifeiras, e todo iso que nos parece que é moderno coma o rap, o hip - hop, as pelexas de galos... xa vén de vello!  E é noso!  É algo que se nos daba ben e que se facía xa non só en ocasións especiais, senón tamén de cotío.

     Aquí deixo as imaxes das nosas futuras regueifeiras.