XVIII Certame literario

 

“Aquela mañá de marzo, por fin, algo rompeu a súa rutina” foi a escusa que serviu de inspiración aos 216 alumnos e alumnas que se deron cita o pasado 10 de marzo no ximnasio do noso instituto para escribir historias e poesías.

Xunto coa frase de Rocío Leira, este ano madriña do certame, tamén quixemos homenaxear a Luísa Villalta e dela escollemos a frase para os que escollesen a opción de poesía: “ Ando cos pés con que me andas e eu te sigo ”. 

Este ano celebramos o 25 aniversario da creación  do noso instituto e xa son dezaoito as edicións do certame literario que está plenamente consolidado na nosa bisbarra, acudindo un total de 6 centros educativos. Sen a participación e a implicación de todos eles non poderiamos seguir homenaxeando á palabra e á literatura. 

Por iso, o único que nos resta dicir é grazas ao profesoradoo e alumnado dos centros: CEIP A Florida, CEIP de Nantes, CEIP Portonovo, Colexio Plurilingüe Abrente, IES Vilalonga e IES Sanxenxo.

O 7 de Xuño saberemos os finalistas e os gañadores das 3 categorías nunha cerimonia no auditorio Emilia Pardo Bazán de Sanxenxo.

Entrega de premios XVII Certame literario IES Sanxenxo e traballos publicados

O venres 9 de xuño como é costume tivo lugar a entrega de premios aos finalistas desta edición do Certame literario IES Sanxenxo. Tamén foi o momento de facer público o nome dos e das gañadoras en cada unha das categorías.

Como xa adiantaramos, este ano a participación superou todas as nosas expectativas, aínda que non puideron participar por diferentes motivos o CEIP A Florida e o CEIP de Nantes. 

O cantante Raúl, veciño do noso concello, puxo a música no acto de entrega e a concelleira de Cultura e educación Paz Lago, o libreiro Jaime Corral da librería Nós e a Presidenta da ANPA fixeron  entrega dos premios. 

CATEGORÍA A

FINALISTA	COLEXIO	POSICIÓN
Antía Balea González	CEIP PORTONOVO	1º PREMIO
Ana Cecilia Gómez Morriello	CEIP PORTONOVO	2º PREMIO
Sara Alonso Iglesias	CEIP PORTONOVO	FINALISTA
Blanca López Rodiño	CEIP PORTONOVO	FINALISTA
Enma Martínez López	CEIP PORTONOVO	FINALISTA
Adrián Martínez Rivas	CEIP PORTONOVO	FINALISTA

CATEGORÍA B

FINALISTA	COLEXIO	POSICIÓN
Mariña Fariña Alfonso	IES VILALONGA	1º PREMIO
Lucas Carrascal Bouzada	IES VILALONGA	2º PREMIO
Diana de Sousa Basdediós	IES VILALONGA	FINALISTA
Xiomara Dios Solano	IES SANXENXO	FINALISTA
Sofía Barragáns Pérez	IES VILALONGA	FINALISTA
Nerea Varela Garrido	IES VILALONGA	FINALISTA
Alba Domínguez Soutullo	IES VILALONGA	FINALISTA
Diana Prieto Lores	IES SANXENXO	FINALISTA
Irene Camiña Prieto	IES SANXENXO	FINALISTA
Sara Vlad Viso	IES VILALONGA	FINALISTA

 

CATEGORÍA C

FINALISTA	COLEXIO	POSICIÓN
Uxía Toba Poza	IES VILALONGA	1º PREMIO
Sara Rodiño Gondar	IES SANXENXO	2º PREMIO
Carla Barreiro Fontenla	IES VILALONGA	FINALISTA
Marta Infanzón Sabarís	IES SANXENXO	FINALISTA
Alicia Valle Besada	IES SANXENXO	FINALISTA
Laura Prieto Galiñanes	IES SANXENXO	FINALISTA
Carlota Pampín Leiro	IES SANXENXO	FINALISTA
Agatha Montes Machado	IES VILALONGA	FINALISTA

Proximamente serán publicados os traballos en papel e repartiranse os exemplares entre os centros participantes. Pódese descargar a publicación e ler os traballos gañadores e finalistas clicando na imaxe que hai embaixo.

Certame Literario IES Sanxenxo 2023

Dezasete anos non son nada ou son moitos segundo se mire. A organización do certame supón todo un reto para o noso instituto ano tras ano pois son moitos os alumnos e alumnas que se mobilizan e se achegan para demostrar o seu talento e contribuír a manter viva a creación e a escrita en lingua galega.

 

Os textos escollidos desta volta foron dos autores Fran Alonso e Eva Mejuto. Douscentos setenta e cinco alumnos e alumnas déronse cita e encheron o pavillón para escribir durante case dúas horas. Nesta ocasión por motivos distintos e viaxes xa programadas non estivo o alumnado do CEIP A Florida nin CEIP Nantes pero foi a máis multitudinaria edición de cantas se recordan.

O vindeiro venres 9 de xuño será a entrega de premios no auditorio Emilia Pardo Bazán e alí estarán os e as finalistas para recolleren os seus premios en cadansúa categoría.

XVII Certame literario IES Sanxenxo

O vindeiro 19 de maio reunirémonos centos de persoas para unha nova edición do Certame literario que cada ano organizamos dende o noso centro para todos os centros educativos do concello de Sanxenxo.

Xa van dezasete edicións e este ano agárdase que sexa das de maior asistencia de todas cantas levamos feitas.

Ás 11:00 comezará coa apertura dos sobres e durante dúas horas poderán compoñer, crear e idear o seu relato ou a súa poesía. Tres categorías (3º ciclo de primaria, 1º ciclo da ESO e 2º ciclo da ESO), dez finalistas por categoría e 9 gañadores en total para esta nova edición.

Lebres como gacelas.

Tomando como inspiración a obra Tigres coma cabalos (1990), na que cada poema da escritora Xela Arias confronta cunha imaxe do fotógrafo Xulio Gil, nace este proxecto multidisciplinar que mestura palabra e imaxe, poesía e fotografía en perfecta simbiose. Lebres coma gacelas establece unha analoxía con ese curioso título, pero escolle dous nomes de animais en feminino cunha clara declaración de intencións, reforzada ademais pola asociación simbólica que estes teñen coa intelixencia, coa axilidade e coa liberdade.

Palabra e imaxe, poesía e fotografía, dialogan en homenaxe a Xela Arias na nova exposición que a Deputación de Pontevedra organiza no marco da celebración das Letras Galegas, reunindo 21 poemas das poetas Tamara Andrés, Alba Cid, Lorena Conde, Lara Dopazo, Miriam Ferradáns, Olga Novo e Antía Otero, que se inspiran nas imaxes dos tamén artistas referentes Eva Díez e Fran Herbello.

Accede á exposición AQUÍ

Agora a Deputación de Pontevedra estende a modo de concurso a idea desta exposición e desta volta será o alumnado de secundaria quen poida achegar as súas composicións a este concurso e así homenaxear outra volta á autora Xela Arias.

Pica na imaxe para consultar as bases de participación.

Dende o IES Sanxenxo alumnos e alumnas enviaron as súas propostas e estas son algunhas das enviadas. Por orde: Carmen Berreco, Zoe Cappellino, Verónica Vázquez e María Martínez

 

 

XV Certame Literario IES Sanxenxo

Logo de vérmonos obrigados a suspender no 2020 o certame por mor da pandemia, este ano a pesar das incertezas, protocolos e restricións tiñamos o convencemento de organizar a décimo quinta edición aínda que non puidese ser como de costume.

A recepción da idea por parte de todos os centros participantes do concello non puido ser máis entusiasta e colaborativa e de feito igualamos o número de participantes de pasadas edicións, chegando este ano aos 230 alumnos e alumnas.

O pasado día 21 de maio celebrouse simultaneamente á mesma hora en cada un dos centros, que xa dispoñían previamente das plicas e dos sobres con toda a información.

Nesta ocasión non puidemos concentrar no pavillón ao alumnado participante e tivemos que dispoñelos en diferentes aulas para así poder manter a distancia de seguridade.

A próxima semana daremos a coñecer os 10 finalistas en cada unha das categorías e os traballos gañadores que serán editados.

Recital poético musical Xela Arias

O venres 23 de Abril quixemos conmemorar o Día do Libro cun recital poético- musical que serviu de homenaxe á poeta Xela Arias. Conxuntamente co departamento de música, quixemos deste xeito dar a coñecer as novas voces da poesía galega actual, que conseguen abrir novos camiños e están a colleitar importantes premios fóra das nosas fronteiras.

Poesías de Gonzalo Hermo, Martín Veiga, Berta Dávila, Baldo Ramos, Fran Alonso, Ana Romaní, Olga Novo, Estevo Creus , María Lado ou Ismael Ramos foron interpretadas por alumnos e alumnas de 1º, 3º e 4º de ESO; poñendo de manifesto a pluralidade de estilos e sensibilidades.

Tamén houbo un oco para lermos poemas das autoras que gañaron nos últimos anos o Premio Nacional de Poesía, como son: Olga Novo e Pilar Pallarés.

No bloque final interpretaron poemas de cada unha das obras de Xela Arias, poeta homenaxeada nas Letras Galegas 2021.

Rematamos o acto coa canción Negra Sombra, interpretada pola alumna Andrea Méndez acompañada á guitarra por Marcial Escudero.

 

Escaleiras Carvalho Calero

A pandemia e a suspensión das actividades lectivas fixo que pasase inadvertido un autor reclamado durante anos por moitos colectivos culturais, asociacións e persoas de toda clase. Para conmemorar o Día das Letras Galegas 2020 decidiramos facer unha intervención artística, embelecendo unha parte do edificio, nas escaleiras que dan acceso ao primeiro andar e que veñen da porta traseira que une co pavillón e co patio exterior.

Non quixemos deixar pasar a oportunidade e aínda que tarde retomamos a idea que quedara en suspenso a finais do curso pasado e puxémonos mans á obra e xunto co alumnado TIC de 4º de ESO confeccionamos os carteis que conforman un dos poemas do autor ferrolán UN CABELO DE ANXO (respectando na súa integridade a ortografía coa que foi escrito).

Así, a única escaleira que hai no noso centro pasa a ser Escaleiras Carvalho Calero e cada vez que subamos poderemos pousar os ollos e ler as palabras poderosas dun gran escritor.

Un cabelo de anjo

pendurado do ceo,
se non é a espada de Damocles
é adival para o espírito,
xemido equilibrista,
que, nel agarrado,
pode arrandear sobre a terra
e crer que é a araña dun fío

tirado do seu propio miolo,
cordón umbilical que o vencella
ao seu niño que está no azul.
Mais non sabemos
que é o norte, que é o sul,
o cénit e a nada,
a vida e a morte,
a terra e o ceo,
cal é o metro que leva ao paraíso
e que aeronave nos conduz ao inferno.

De clássicos livres gaña o concurso Musicando Carvalho Calero

Logo dunha intensa final, o grupo De clássicos livres gaña o certame Musicando Carvalho Calero, organizado pola Associaçom Galega da Língua e coa colaboración da Radio Galega.

Presentáronse máis de oitenta bandas e solistas que logo un xurado popular reduciu a dez. A escolla da banda gañadora fíxose mediante un proceso de votación popular, do que xa falamos en post anteriores,  a través da rede e que debía confirmarse  mediante un sms para evitar a duplicidade de votos.

Parabéns á banda gañadora non só polo premio senón tamén pola belísima proposta musical, Ferrol 1916.

Se queres saber algo máis De clásicos libres pica o AQUÍ para ler a entrevista que aparece en Nós díario. E se queres volver escoitar a canción aquí vola deixamos.

Musicando Carvalho Calero

 

A Radio Galega e a Associaçom Galega da Língua (AGAL) organizan o concurso ‘Musicando Carvalho Calero’, ao que poden presentarse solistas e grupos de calquera estilo musical e que ten como obxectivo dar a coñecer a figura do autor homenaxeado este ano polo Día das Letras Galegas.

O 30 de outubro rematan as audicións onde poderás votar polos tres temas finalistas que máis che gusten.

Se queres escoitar as cancións finalistas e votar por algunha delas PINCHA AQUÍ

Maria Siléncio. Carvalho Calero

O mundo non para e detrás dun día vén outro día. Tras un ano vén outro ano.

Hoxe como cada 17 de maio é o Día das Letras Galegas e aínda restan moitos días para honrar como se merece a Ricardo Carvalho Calero. 

Deixámosvos o poema Maria Siléncio, incluído no seu libro Pretérito Imperfeito, musicado por A Minha Embala e Fanny+Alexander.

Ricardo Carvalho Calero 1910-1990

Cabeleira de chúvia, ollos de néboa.
Maria Siléncio, esfarrapada, à espreita.

Sempre agardando, pola noite, as barcas.
A tua angúria fala con olladas.

Maria Nocturna: no peirán ¿qué esperas?
¿polo dia non vives?
¿Naces cada solpor? ¿Cais de primeira estrela?

Maria Siléncio, sempre dura e muda...
¿Cál é a barca que agardas?

Das fontes dos teus ollos
fluen rios de sono.
Pero ti sempre dura e desvelada,
batida polo vento, no peirán...

Maria Siléncio, eu roubaria
no ceu
a estrela de mel,
na água
a estrela de prata,
pra che mercar a fala.

Se queres ulir flores,
darei-che a flor da lua.

Maria do Mar, ¿qué barca agardas?

¿Queres o sol, carne de lua fria?

O sol é un porco-espiño disfarzado.
No mar agora, ourizo de mar, dorme.

Pescado pola cana do abrente,
darei-cho eu, raiolante e mollado.

¡Maria Siléncio, Voz Dormida: fala!

¿A qué afogado esperas,
Maria da Sombriza Espranza?

Maria Siléncio, ¿aagardas a tua voz?
¿As ondas do mar levado roubaron-cha?

De chúvia e vento vestida,
Maria Siléncio, calada...

Carvalho Calero, Ricardo (1980) Pretérito Imperfeito (1927-1961) (A Coruña: Ediciós do Castro)

Entrega de premios XIV Certame Literario

Eran as 8 da tarde e máis dun cento de  persoas ían acomodándose no auditorio Emilia Pardo Bazán. O motivo non era outro que coñecer os gañadores do certame literario.

Os presentadores Cecilia González e Iván Burgos fixeron de mestres de cerimonia nunha tarde onde non faltou nada. 

A música  estivo a cargo de Adrián Torres, cantautor pontevedrés afincado no Grove, que puxo un toque de cor e ritmo a toda a velada.

O escritor convidado Xesús Constela na súa intervención animou a todos a seguir escribindo porque se hai algo marabilloso é crear historias e mundos diferentes; pero aínda moito máis é compartilo cos demais.

Apostou porque iniciativas coma estas teñan continuidade porque son moi importantes para achegar a mocidade á literatura.

Os trinta finalistas das diferentes categorías foron subindo ao estrado para recoller o diploma e o seu agasallo particular. 

Aitor Martínez recolleu o premio do concurso de logo, convocado pola ANPA, e que a partir de agora será a imaxe do noso centro. Co mar como fonte de inspiración, nel están presentes os diferentes azuis do mar e as ondas. Un fermoso deseño que gustou a todos.

Os gañadores da categoría A, para alumnado de 5º e 6º de EP foron para:

Uxío Rodríguez Gómez (1º Premio) e Alicia Valle Besada (2º Premio). Ambos do CEIP A Florida de Sanxenxo.

Mentres que para a categoría B, para alumnado de 1º e 2º de ESO, as premiadas foron:

Eva de Apellániz Álvarez (IES Vilalonga) 1º Premio

María Dono Gómez (IES Sanxenxo) 2º Premio

Os gañadores da categoría C, que correspondía a alumnado de 3º e 4º de ESO, recaeu en:

Natalia Piñeiro Oubiña (IES Sanxenxo) 1º Premio

Mario Santiso Ferreirós (IES Vilalonga) 2º Premio.

O noso máis sincero agradecemento tanto á ANPA, ao concello de Sanxenxo e especialmente ao escritor Xesús Constela e aos membros do xurado: Mar Caneda, Mª José Iglesia, Gloria Fontán, Tamara Andrés e Xosé Iglesias.

XIV Certame Literario IES Sanxenxo

Como cada ano, e van xa catorce, centos de alumnos e alumnas de todo o concello déronse cita no noso centro para homenaxear á nosa lingua escribindo un poema ou un relato.

Coma anos pasados, dous textos serviron de inspiración para cada unha das composicións. Nesta ocasión os escritores Tamara Andrés e Xesús Constela elixiron un anaco dalgunha obra deles.

Dúas horas concentrados e escribindo para saber se ao final serán algún dos textos elixidos deste novo certame.

Máis de 270 alumnos e alumnas pertencentes ás 3 categorías que van dende 5º de Primaria  a 4º de ESO.
Moitas grazas a todos e a todas, os profesores e os centros de ensino por seguir facendo posible este certame. O 13 de xuño coñeceremos os gañadores.

Anagnórise en Cambados

Esta semana fomos co alumnado de 3º da ESO ao teatro a Cambados.

Formando parte das actividades para conmemorar as Letras Galegas deste ano, fomos a ver Anagnórise, a obra de María Victoria Moreno, adaptada á escena, pola compañía Limiar Teatro.

Foi unha moi boa adaptación para a rapazada, xa que, a través de distintos sckechs, fixeron unha aproximación á obra, e sobre todo ao propio significado do título.

Gustou moito e, sen dúbida, repetiríamos.