25N contra a violencia de xénero

É esta unha data que non nos gusta recordar pero cremos que é preciso facelo mentres na nosa sociedade estea presente esta barbarie ano tras ano. 

 

Os alumnos de Artes Escénicas e danza prepararon  un pequeno vídeo para denunciar a violencia que sofren as mulleres e durante dous días estiveron ensaiando e gravando  a peza audiovisual que podes ver a continuación

Aquí deixamos algunhas fotos do proceso de gravación.

Magosto 2019

Chegou o outono e con el o magosto. Será o vindeiro mércores 30 de Outubro. Ese día  saberemos quen son os gañadores dos concursos de sobremesas e de calacús.

Podes consultar as bases na seguinte ligazón:
Concurso de doces de outono e calacús

Como é costume, ademais  de comer as castañas, participamos en diferentes xogos populares como o pano ou tirar da corda. Pero ademais, estoupamos globos con ourizos, xogamos a encestar castañas ou a comer o iogur cos ollos pechados.  

Aínda que o tempo non foi o que nos gustaría, iso non impediu que desfrutásemos un ano máis dunha festa tan nosa como auténtica. 

Charla de ex-parlamentarios no IES

Dende hai case 10 anos o Parlamento de Galicia sae da rúa do Hórreo para achegar á sociedade e principalmente aos estudantes o labor da institución, ensinarlles como funciona e acabar con mitos moi estendidos que contribúen á desafección da política na actualidade.

O pasado xoves, tres ex-parlamentarios da cámara autonómica visitáronnos e charlaron co alumnado de 4º de ESO, contestando a moitas preguntas que ían tanto da actualidade como dúbidas relativas ao traballo dos parlamentarios e á súa experiencia política.

Paula Janza, Salomé Álvarez e Xulio Pardellas  con ideas distintas pero con moita sintonía persoal foron os protagonistas deste encontro.

 Podes ver a noticia saída en prensa na seguinte ligazón

Revista AQUELAR

Outro ano que remata e foron moitas as actividades que levamos a cabo. De moitas delas xa demos conta ao longo do curso pero outras quedaron penduradas nas paredes, gardadas nos  cartafoles e a maioría nos recordos de todos e de todas.

Coa revista que cada ano editamos queremos facer unha síntese senón de todas polo menos da grande parte delas.

Aquí vola deixamos  para que poidades relembrar todo aquilo que fixemos xuntos este curso que agora remata.

Pincha na imaxe e terás acceso á información.

Portada Aquelar

Entrega de premios XIV Certame Literario

Eran as 8 da tarde e máis dun cento de  persoas ían acomodándose no auditorio Emilia Pardo Bazán. O motivo non era outro que coñecer os gañadores do certame literario.

Os presentadores Cecilia González e Iván Burgos fixeron de mestres de cerimonia nunha tarde onde non faltou nada. 

A música  estivo a cargo de Adrián Torres, cantautor pontevedrés afincado no Grove, que puxo un toque de cor e ritmo a toda a velada.

O escritor convidado Xesús Constela na súa intervención animou a todos a seguir escribindo porque se hai algo marabilloso é crear historias e mundos diferentes; pero aínda moito máis é compartilo cos demais.

Apostou porque iniciativas coma estas teñan continuidade porque son moi importantes para achegar a mocidade á literatura.

Os trinta finalistas das diferentes categorías foron subindo ao estrado para recoller o diploma e o seu agasallo particular. 

Aitor Martínez recolleu o premio do concurso de logo, convocado pola ANPA, e que a partir de agora será a imaxe do noso centro. Co mar como fonte de inspiración, nel están presentes os diferentes azuis do mar e as ondas. Un fermoso deseño que gustou a todos.

Os gañadores da categoría A, para alumnado de 5º e 6º de EP foron para:

Uxío Rodríguez Gómez (1º Premio) e Alicia Valle Besada (2º Premio). Ambos do CEIP A Florida de Sanxenxo.

Mentres que para a categoría B, para alumnado de 1º e 2º de ESO, as premiadas foron:

Eva de Apellániz Álvarez (IES Vilalonga) 1º Premio

María Dono Gómez (IES Sanxenxo) 2º Premio

Os gañadores da categoría C, que correspondía a alumnado de 3º e 4º de ESO, recaeu en:

Natalia Piñeiro Oubiña (IES Sanxenxo) 1º Premio

Mario Santiso Ferreirós (IES Vilalonga) 2º Premio.

O noso máis sincero agradecemento tanto á ANPA, ao concello de Sanxenxo e especialmente ao escritor Xesús Constela e aos membros do xurado: Mar Caneda, Mª José Iglesia, Gloria Fontán, Tamara Andrés e Xosé Iglesias.

XIV Certame Literario IES Sanxenxo

Como cada ano, e van xa catorce, centos de alumnos e alumnas de todo o concello déronse cita no noso centro para homenaxear á nosa lingua escribindo un poema ou un relato.

Coma anos pasados, dous textos serviron de inspiración para cada unha das composicións. Nesta ocasión os escritores Tamara Andrés e Xesús Constela elixiron un anaco dalgunha obra deles.

Dúas horas concentrados e escribindo para saber se ao final serán algún dos textos elixidos deste novo certame.

Máis de 270 alumnos e alumnas pertencentes ás 3 categorías que van dende 5º de Primaria  a 4º de ESO.
Moitas grazas a todos e a todas, os profesores e os centros de ensino por seguir facendo posible este certame. O 13 de xuño coñeceremos os gañadores.

Obradoiro de Poesía con Tamara Andrés

Visitounos esta mañá a poeta Tamara Andrés, unha prometedora poeta finalista do Premio Nacional de Poesía Joven "Miguel Hernández" polo seu poemario "O corpo de Antiochia" para falarnos de poesía, ensinarnos novos xeitos de crear, outras propostas feitas por xóvenes poetas onde non hai límites para a palabra. Onde a música, as artes plásticas e o vídeo tamén serven para contar e transmitir unha chea de cousas.

Poetas como Nuria Vil, Cinta Adhesiva ou Jesús Castro foron algúns exemplos dos que se valeu a autora para facernos descubrir outra perspectiva da poesía galega e en galego.

E despois de compartir, de falar e de escarvar en cada un dos poemas tocounos escribir e expresarnos. Ela deunos o pé e a nós tocounos tirar do fío...ata onde puidemos... 

I Certame de Regueifas

O pasado xoves 11 de  Abril tivo lugar no Auditorio Emilia Pardo Bazán o I Certame de Regueifas Concello de Sanxenxo, organizado polo IES Sanxenxo en colaboración cos Equipos de Dinamización Lingüística do IES Vilalonga e  Colexio Plurilingüe Abrente.

 
Cento oitenta alumnos e alumnas de 1º e 2º de ESO dos 3 centros de ensino de secundaria do municipio  déronse cita para apoiar aos compañeiros que os representaban e que subiron ao escenario para amosar todo o aprendido nas dúas sesións formativas previas desenvolvidas polos regueifeiros Lupe Gómez e Josinho de Tareixa.

 
O obxectivo cando ideamos este certame era  que os xóvenes empregasen a lingua propia de xeito natural e a vinculasen a actividades lúdicas mellorando a súa expresión oral.
Tamén queriamos achegarlle a regueifa, unha tradición de carácter popular moi estendida no seu día e que hoxe diferentes persoas e asociacións traballan pola súa recuperación.

 
Non podemos máis que agradecer tanto aos responsables dos centros, ao concello de Sanxenxo, á Secretaría Xeral de Política Lingüística  e á ANPA do IES Sanxenxo a axuda e colaboración para levar a bo termo esta actividade.
E por suposto, felicitar ao alumnado que amosou respecto polos compañeiros, enxeño, ganas de divertirse e de aprender e que mostrou con orgullo as súas habilidades improvisatorias e deu ánimos a todos nunha festa para a cultura e para a  lingua galega.



Moitos medios fixéronse eco da noticia e foi moita a repercusión. Aquí deixamos algunhas ligazóns:

https://www.farodevigo.es/portada-pontevedra/2019/04/12/regueifas-promover-o-galego-oral/2086618.html

https://pontevedraviva.com/xeral/53849/batalla-regueifas-sanxenxo/?lang=es

https://www.elcorreogallego.es/tendencias/ecg/primeiro-certame-regueifas-sanxenxo/idEdicion-2019-04-12/idNoticia-1176644/

https://porgaliciabaixo.com/web/es/1o-certamen-de-regueifas-del-ayuntamiento-de-sanxenxo/

https://www.farodevigo.es/portada-pontevedra/2019/04/09/obradoiros-e-certame-regueifas-pazo/2084654.html

Roteiro Castelao

Alumnos de 4º ESO percorreron as rúas da parte histórica de Pontevedra e imaxinaron aqueles anos en que Castelao viviu na cidade do Lérez e onde desenvolveu unha intensa actividade cultural, artística e política.

Foi un paseo pola cidade medieval e polas rúas que conservan os nomes dos oficios de antano como: toneleiros, picheleiros. Polas prazas onde se vendían as sementes, as verduras ou as aves de curral (Da Herba, da Alfóndiga, da Verdura ou da Leña)-

Parada obrigada foi visitar o Museo de Pontevedra e unha remodelada sala que alberga a obra pictórica máis importante do autor rianxeiro.

“Meu estimado compatriota,

Non teño ningún documento, nin tan siquera unha partida de nascimento para acreditar a miña calidade de pontevedrés; pero se non fun consultado antes de nascer, sábese ben que des-pois de ter nascido escollín a Pontevedra para vivir e morrer, e se tal programa non chega a complirse non será certamente por culpa miña. Non son, pois, un pontevedrés de partida de nascimento, que ás veces esto é entrar pola porta falsa; eu son pontevedrés pola miña propia vontade e pola identificación coas terras e xentes de Pontevedra.”

 

Castelao, 31 de marzo de 1947

Para saber máis sobre o roteiro pincha aquí

Obradoiro de regueifas

Antigamente a regueifa era un pan ou unha rosca que se regalaba nas vodas entre os convidados e que repartía aquel máis enxeñoso na arte da improvisación.

Co obxectivo que os xóvenes empreguen a lingua propia de xeito natural e a vinculen a actividades lúdicas mellorando a súa expresión oral estanse a desenvolver nos diferentes institutos de secundaria do concello un obradoiro de regueifas onde a axilidade mental, o ritmo e o enxeño son elementos primordiais para a composición destas coplas. Unha tradición presente en moitos lugares do mundo e que vinculan ao ser humano coas súas raíces e coa palabra, elemento indispensable para crear historias.

Lupe Gómez e Josinho de Tareixa son os encargados de guiar ao alumnado nesta arte da improvisación

Dúas sesións servirán para preparar a alumnos e alumnas de 2º de ESO para o certame intercentros que terá lugar o 11 de abril no Auditorio Emilia Pardo Bazán e que conta coa colaboración da Secretaría Xeral de Política Lingüística.

Made in Galiza. Obra de teatro

Un dos libros con máis pegada dentro do panorama editorial galego, Made in Galiza, segue a ter percorrido e segue a estar de vixente actualidade. Nesta ocasión foi a compañía teatral Os Quinquilláns quen se atreveu a levalo ás taboas. Desta maneira adaptaron algunha das historias presentes nesta obra que na actualidade vai xa pola 12ª edición e segue a ser lectura obrigada en moitos centros de ensino da nosa xeografía.

Un libro de historias orixinais que teñen como fío condutor a palabra, o idioma e que fai que reflexionemos sobre a nosa identidade. 

Na obra, dous membros da LP (Language Planning) acaban de chegar a terras galegas coa finalidade de acabar co conflito lingüístico e tentando impoñer as súas teses.

A pesar do traballo feito pola LP e da súa determinación por acabar co problema, as dificultades medran día a día.

Os Quinquilláns botan man do humor e da retranca. Unha sucesión de escenas que a pesar da súa comicidade fan que reflexionemos sobre a nosa realidade e que nos cuestiona como podemos mudala.

Alumnado de 2º de ESO, logo de ler a obra, asistiu á representación que tivo lugar en Cambados e aproveitou para ruar pola vila do albariño e tamén visitou a casa natal de Ramón Cabanillas.

Xornalismo na escola

O pasado xoves  alumnos de 3º ESO e 4º de ESO participaron no obradoiro desenvolvido polo Colexio de Xornalistas en colaboración coa Obra Social "La Caixa" co nome Xornalismo na escola e que xa vai pola 4ª edición.

Diferentes profesionais  impartirán estas  xornadas didácticas sobre comunicación a alumnos de 3º e 4º da ESO en Institutos de Ensino Secundario de toda a xeografía galega.

Un total de 90 obradoiros que teñen como  obxectivo introducir ao alumnado no mundo dos medios de comunicación, cada vez máis importante hoxe en día.

O alumnado tivo a oportunidade de entender o funcionamento dos medios de comunicación e coñecer o seu papel na sociedade, aprendendo a diferenciar entre as noticias reais e "fake news", contrastar informacións e fomentar o espírito crítico.

8 de Marzo. Alfombra das inxustizas

Dentro da multitude de actos e de accións previstas para este 8 de marzo, quixemos visibilizar aínda o longo camiño que queda por percorrer.

Dentro do noso refraneiro galego existen moitas frases cheas de machismo e o peor de todo é que algunhas seguen a dicirse na fala coloquial.

Por iso, fixemos unha longa alfombra á que chamamos DAS INXUSTIZAS onde puxemos todas aquelas frases e refráns ferintes contra as mulleres e colocámola no vestíbulo para que todas e todos pasemos por enriba.

Porque hai moito que mudar e tanto a linguaxe como acabar cos prexuízos sexistas é unha parte máis para conseguir a igualdade.

 

Premios Rosalía en Sanxenxo

Celebramos o día de Rosalía premiando os traballos do concurso Rosalía en Sanxenxo. Aínda que nos tivese gustado unha maior participación, algúns traballos foron de moita calidade e non foi fácil para o xurado decidirse.

O concurso consistía en tirar unha fotografía dalgún lugar ou motivo do concello de Sanxenxo para ilustrar uns versos da nosa autora máis universal e este foi o resultado.

Aitor Martínez Hermida (Praza do Enxido-Portonovo)

Lucas Sueiro Fernández (Piñeiral de Baltar)

Sara Martínez (Paseo de madeira praia de Baltar)

Noraboa aos gañadores e a todos os participantes.

Día da lingua materna

Dende o ano 2000 celébrase cada 21 de Febreiro o día da lingua materna e este ano está adicado ás linguas indíxenas, en tanto factor de desenvolvemento, paz e reconciliación.

A lingua materna é aquela en que nenos e nenas aprenden a falar e a relacionarse co seu contorno máis próximo. A UNESCO quere impulsar o coñecemento e a práctica das linguas maternas de menos falantes tamén na escola, nos medios de comunicación, na internet... fóra dos ámbitos en que moitas delas quedan recluídas. O Día Internacional da Lingua Materna estableceuse para sensibilizar acerca da importancia dos idiomas e da función vital que desempeñan no desenvolvemento, ao garantir a diversidade e o diálogo intercultural, así como o fortalecemento da cooperación e a consecución da educación de calidade para todos, a construción de sociedades do coñecemento integradoras e a preservación do patrimonio cultural.

Nós quixemos celebrar este día fotografándonos cunha palabra nosa para así darlle visibilidade ao noso idioma. Aquí tendes alguhas instantáneas...