Concurso "Cartas de amor pola Candeloria"

Antigamente dicían que o día 2 de febreiro era o día do amor:

“Pola Candeloria casan os paxariños e maila galiñola”

Esta data parécenos ideal para amosar os nosos sentimentos a aqueles que máis queremos e tamén reivindicar unha data propia que se confronta con outras conmemoracións importadas.

Por iso queremos desde o EDL que este ano "biques en galego".

Escribe unha carta ou unha declaración de amor en lingua galega que pode ir dirixida a outras persoas, á natureza ou calquera cousa animada que nos guste tanto que sexa capaz de espertar en nós sentimientos de amor.

- Poderán redactarse en prosa ou en verso, a man, a máquina ou a ordenador... e non deberán sobrepasar unha carilla de extensión.

- Poderanse empregar todas aquelas técnicas que se desexe, incluír debuxos, fotos....

- Terase en conta o grao de elaboración, a orixinalidade, o correcto uso do idioma e a calidade da lingua.

Todas as cartas deberán ser inéditas e cada participante só poderá enviar unha carta.

Podes enviar os teus traballos ben en word ou escaneados a este enderezo: endlsanxenxo@gmail.com ou entregarllos á túa profesora.

O prazo remata o día 31 de Xaneiro

Postais pola Candeloria

Queda xa un pouco atrás, o tempo en que casan os paxariños e empeza a agromar a primavera.  Pero como este ano non parece que se decidira a agromar ata hai uns días, rememoramos a data agora.

A Candeloria é unha festividade que ten orixe pagá, relacionada cos cultos de fertilidade e ciclos da natureza, coma o Nadal ou a Noite do San Xoán.

En Galiza temos aínda moitas festividades deste tipo, porque sempre fomos xente achegada á terra, que debía saber os tempos das sementeiras e das colleitas, e non despistarse ante posibles cambios meteorolóxicos que levaran ao traste as producións.

É por isto que, unha vez instaurada a relixión cristiá, se reconverteron todos estes ritos en ofrendas e rituais a santos e santas: cristianizáronse.  Pero seguen tendo a mesma base relacionada coa terra e a súa fertilidade.

Hoxe en día, celébrase coma unha festa de Purificación da Virxe María, na que se acenden candeas que servirán para protexernos das tronadas e axudar a almas perdidas a chegar ao seu destino.  En Meaño, que o temos ben preto, celébrase!

Hai moitos refráns que ilustran este tempo:

-  Cando a Candeloria chora, medio inverno vai fóra; que chore, que deixe de chorar, mitá do inverno está por pasar.

-  Pola Candeloria casan os paxariños e maila galiñola.

É unha data que se toma de referencia como inicio de vida; xa metade do inverno vai fóra, os paxariños comezan a buscar compañeiro/a para ir arrombando o niño... e por iso, se toma tamén coma unha festividade do amor, da amizade.

No IES Sanxenxo non iamos ser menos, e o Equipo de Dinamización Lingüística, argallamos o I Concurso de Postais pola Candeloria.

A participación non foi moi ampla, pero si de moita calidade, resultando gañadoras varias rapazas e un rapaz, todas elas de 1º da ESO, un dos cursos máis participativos nas convocatorias do centro.  Foron os seguintes:

1º premio

Óscar Barreal Agís, Lucía Sanmartín Fraga e Clara Sueiro Figueiras

2º premio

Cecilia González Padín

3º premio

Anabel Martínez Torres, Elena Sueiro Castro e Ángela Viéitez Castro

Parabéns a todas e seguide sendo así de participativas e celebrando así de bonito o amor e amizade!!